കുന്ദമംഗലം : ടൂറിസത്തിന് അനന്തസാദ്ധ്യതയുള്ള സ്ഥലമാണ് കുന്ദമംഗലമെന്ന്
എം.എ.റസാക്ക്മാസ്റ്റർ എം.എൽ.എപറഞ്ഞു
കുന്ദമംഗലം ബ്ലോക്ക് പഞ്ചായത്തിലെ എട്ട് ഗ്രാമപഞ്ചായത്തുകളും ടൂറിസത്തിന് അനന്തസാദ്ധ്യതയുള്ള സ്ഥലങ്ങളാണെന്നും ഇത്തരം ചർച്ചകൾക്ക് താൽപ്പര്യമെടുത്തതിൽ കുന്ദമംഗലം ബ്ലോക്ക് പഞ്ചായത്തിനെ അഭിനന്ദിക്കുന്നുവെന്നും എം.എ.റസാക്ക്മാസ്റ്റർ എം.എൽ.എ പറഞ്ഞു. കുന്ദമംഗലം ബ്ലോക്ക് പഞ്ചായത്ത് സംഘടിപ്പിച്ച ‘മനോഹരം’ ടൂറിസം കോൺക്ലേവ് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കല്ലായിപുഴയുടെ പോഷകനദിയാണ് കുന്ദമംഗലം മണ്ഡലത്തിലൂടെ ഒഴുകുന്ന മാമ്പുഴ. മൂന്ന് പഞ്ചായത്തുകളിലൂടെ18 കിലോമീറ്റർ നീളത്തിലാണ് ഈ പുഴ ഒഴുകുന്നത്. ഈ മാമ്പുഴ വികസിപ്പിച്ച് ജലഗതാഗതം കൊണ്ടുവന്നാൽ അത് കോഴിക്കോട് മാവൂർറൂട്ടിലെ ഗതാഗതകുരുക്കിന് പരിഹാരമാകുമെന്ന് മാത്രമല്ല മൂന്ന് പഞ്ചായത്തുകളും ടൂറിസ്റ്റ് കേന്ദ്രങ്ങളാകുമെന്നും എം.എൽ.എ. പറഞ്ഞു. ചാലിയാറും തെങ്ങിലക്കടവും ടൂറിസത്തിന് സാദ്ധ്യതയുള്ള സ്ഥലങ്ങളാണെന്നും മാവൂരിൽ ഒരു ഇന്റർനാഷനൽ സ്റ്റേഡിയമാണ് വിഭാവനം ചെയ്യുന്നതെന്നും അദ്ദേഹം അറിയിച്ചു. കുന്ദമംഗലം ബ്ലോക്ക് പഞ്ചായത്ത് രാജീവ്ഘർ ഓഡിറ്റോറിയത്തിൽ നടന്ന പരിപാടിയിൽ ബ്ലോക്ക് പഞ്ചായത്ത് പ്രസിഡണ്ട് സി.കെ. ഫസീല അദ്ധ്യക്ഷത വഹിച്ചു. ടി.കെ. രാജേഷ്(സി.ഒ.ഒ.സർഗ്ഗാലയ,കേരള ആർട്സ് ആന്റ് ക്രാഫ്റ്റ് വില്ലേജ്), ശ്രീകല ലക്ഷ്മി (കേരള റെസ്പോൺസ്ബിൾ ടൂറിസം മിഷൻ സൊസൈറ്റി ജില്ലാ കോഡിനേറ്റർ) എന്നിവർ കോൺക്ലേവിൽ കുന്ദമംഗലം ബ്ലോക്കിലെ ടൂറിസം സാദ്ധ്യതയെ കുറിച്ചു വിശദീകരിച്ചു. ബ്ലോക്ക് വൈസ് പ്രസിഡണ്ട് വിനോദ് പടനിലം, ക്ഷേമകാര്യ സ്റ്റാന്റിംഗ് കമ്മറ്റി ചെയർമാൻ എ.കെ.ഷൗക്കത്ത്, ആരോഗ്യ വിദ്യാഭ്യാസ സ്റ്റാന്റിംഗ് കമ്മററി ചെയർപേഴ്സൺ ബബിതവിനോദ്, കേരള കൗമുദി യുനിറ്റ് ചീഫ് എൻ. രാജീവ് എന്നിവർ പ്രസംഗിച്ചു. ചടങ്ങിൽ കർഷകനായ ചന്ദ്രൻവെള്ളനൂർ, ബ്രാൻഡ് അംബാസിഡർ. രൂപിത ദേവരാജ് എന്നിവരെ ആദരിച്ചു. വികസന സ്റ്റാന്റിംഗ് കമ്മറ്റി ചെയർപേഴ്സൺ ധന്യബാബുരാജ് സ്വാഗതവും ബ്ലോക്ക് പഞ്ചായത്ത് സെക്രട്ടറി എം.ഗിരീഷ് നന്ദിയും പറഞ്ഞു.ബ്ലോക്ക് പരിധിയിലെ പഞ്ചായത്ത് പ്രസിഡണ്ടുമാർ വൈസ് പ്രസിഡണ്ടുമാർ സ്റ്റാന്റിംഗ് കമ്മറ്റി ചെയർമാൻമാർ, സാസ്കാരികപ്രവർത്തകർ എന്നിവർ പങ്കെടുത്തു.
About the Author
