ഇന്ത്യൻ U-18 വോളിബോൾ ടീം വൈസ് ക്യാപ്റ്റൻ വർണ്ണിതയെ എം എ റസാഖ് മാസ്റ്റർ എം.എൽ.എ അനുമോദിച്ചു
കുന്ദമംഗലം: ഇന്ത്യയുടെ അണ്ടർ-18 വനിതാ വോളിബോൾ ടീമിന്റെ വൈസ് ക്യാപ്റ്റനായി തിരഞ്ഞെടുക്കപ്പെട്ട കുന്ദമംഗലത്തിന്റെ അഭിമാന താരം വർണ്ണിതയ്ക്ക് കുന്ദമംഗലം നിയോജക മണ്ഡലം എം.എൽ.എ എം.എ.
റസാഖ് മാസ്റ്ററുടെ ആദരം. കായിക രംഗത്ത് ദേശീയ ശ്രദ്ധ പിടിച്ചുപറ്റിയ വർണ്ണിതയെ നേരിട്ടെത്തിയാണ് എം.എൽ.എ അനുമോദിച്ചത്.
ദേശീയ തലത്തിൽ നടത്തിയ ഉജ്ജ്വല പ്രകടനമാണ് വർണ്ണിതയെ ഇന്ത്യൻ ടീമിന്റെ ഉപനായക പദവിയിലേക്ക് എത്തിച്ചത്. കുന്ദമംഗലത്തിന്റെ കായിക ചരിത്രത്തിലെ സുവർണ്ണ നേട്ടമാണിതെന്ന് എം.എൽ.എ പറഞ്ഞു. കഠിനാധ്വാനവും കായികക്ഷമതയും ഒത്തിണങ്ങിയ വർണ്ണിതയ്ക്ക് അന്താരാഷ്ട്ര വേദികളിൽ രാജ്യത്തിന്റെ പെരുമ ഉയർത്താൻ സാധിക്കട്ടെ എന്ന് അദ്ദേഹം ആശംസിച്ചു.
തുടർച്ചയായ കഠിന പരിശീലനവും നാടിന്റെയും കുടുംബത്തിന്റെയും പിന്തുണയുമാണ് തന്നെ ഈ നേട്ടത്തിന് അർഹയാക്കിയതെന്ന് വർണ്ണിത പറഞ്ഞു. വരാനിരിക്കുന്ന രാജ്യാന്തര ടൂർണമെന്റുകളിൽ ഇന്ത്യക്കായി മികച്ച പ്രകടനം പുറത്തെടുക്കാനുള്ള ഒരുക്കത്തിലാണ് ഈ യുവതാരം. ചടങ്ങിൽ പ്രാദേശിക കായിക പ്രമുഖരും നാട്ടുകാരും പങ്കെടുത്തു.
About the Author
