ഹബീബ് കാരന്തൂർ
കുന്ദമംഗലം : ഇന്ത്യൻ വനിതാ ജൂനിയർ വോളിബോൾ ടീമിന്റെ വൈസ് ക്യാപ്റ്റനായി ചരിത്രം കുറിച്ച് നാടിന്റെ അഭിമാനമായി മാറിയ ശ്രീവർണിതയ്ക്ക് (പോപ്പി) കാരന്തൂർ പാറ്റേൺ വോളി അക്കാദമിയുടെ ആഭിമുഖ്യത്തിൽ ഗംഭീര സ്വീകരണം നൽകുന്നു. ഈ ചരിത്രമുഹൂർത്തത്തിന് സാക്ഷ്യം വഹിക്കാനും താരത്തെ അഭിനന്ദിക്കാനുമായി കേരള സംസ്ഥാന കായിക-യുവജനക്ഷേമ വകുപ്പ് മന്ത്രി ബഹു. ഒ. ജെ. ജനീഷ് പാറ്റേൺ വോളി അക്കാദമി സന്ദർശിക്കും.
ജൂലൈ 13 തിങ്കളാഴ്ച വൈകുന്നേരം 4 മണിക്ക് കാരന്തൂർ പാറ്റേൺ ഇൻഡോർ സ്റ്റേഡിയത്തിലാണ് സ്വീകരണച്ചടങ്ങ് സംഘടിപ്പിച്ചിരിക്കുന്നത്. പാറ്റേൺ പ്രസിഡന്റ് എൻ. സുബ്രഹ്മണ്യൻ അധ്യക്ഷത വഹിക്കുന്ന ചടങ്ങിൽ എം. എ. റസാഖ് മാസ്റ്റർ എം.എൽ.എ മുഖ്യാതിഥിയാകും.
പാറ്റേൺ വൈസ് പ്രസിഡന്റും മുൻ എം.എൽ.എയുമായ യു. സി. രാമൻ, ജനറൽ സെക്രട്ടറിയും കോച്ചുമായ സി. യൂസഫ് എന്നിവർക്ക് പുറമെ ഗ്രാമപഞ്ചായത്ത് പ്രസിഡന്റ് സി. വി. സംജിത്ത്, ജില്ലാ പഞ്ചായത്ത് മെമ്പർ സീന അശോകൻ, ബ്ലോക്ക് മെമ്പർ വിനോദ് പടനിലം, വാർഡ് മെമ്പർ സംസാദ നജീബ് തുടങ്ങിയ ജനപ്രതിനിധികളും ചടങ്ങിൽ സന്നിഹിതരാകും.
കൂടാതെ വോളിബോൾ അസോസിയേഷൻ ജില്ലാ പ്രസിഡന്റ് പി. കെ. ബാപ്പു ഹാജി, പാറ്റേൺ മുൻ പ്രസിഡന്റുമാരായ സൂര്യ ഗഫൂർ, സി. മൂസ ഹാജി, കായിക രംഗത്തെ മറ്റു പ്രമുഖരായ പി. നിഖിൽ, സ്പോർട്സ് കൗൺസിൽ പ്രസിഡൻ്റ്, സി. സത്യൻ കേരള സ്റ്റേറ്റ് വോളിബോൾ അസോസിയേഷൻ ജനറൽ സെക്രട്ടറി തുടങ്ങി നിരവധിയാളുകൾ പങ്കെടുക്കും. നാടിന്റെ കായിക സ്വപ്നങ്ങൾക്ക് കരുത്തേകുന്ന ഈ സുവർണ്ണ മുഹൂർത്തത്തിലേക്ക് മുഴുവൻ കായിക സ്നേഹികളെയും ഭാരവാഹികൾ സ്വാഗതം ചെയ്തു.
About the Author
