കുന്ദമംഗലം : കാരന്തൂർ മെംസ് ഇൻറർനാഷണൽ സ്കൂളിൽ നിർമിച്ച അത്ലറ്റിക് സ്റ്റേഡിയം സംസ്ഥാന കായിക, യുവജനക്ഷേമ വകുപ്പ് മന്ത്രി ഒ.ജെ ജനീഷ് ഇന്ന്(തിങ്കൾ)ഉദ്ഘാടനം ചെയ്യും. മർകസ് ജനറൽ സെക്രട്ടറി കാന്തപുരം എപി അബൂബക്കർ മുസ്ലിയാരുടെ നേതൃത്വത്തിൽ നടക്കുന്ന സ്റ്റേഡിയം ഉദ്ഘാടനത്തിൽ രാഷ്ട്രീയ-വിദ്യാഭ്യാസ-കായിക മേഖലകളിലെ പ്രമുഖർ സംബന്ധിക്കും.
സ്കൂൾ പിടിഎ സഹകരണത്തിൽ ഒരു കോടിയോളം രൂപ ചെലവഴിച്ചാണ് വിവിധ കായിക ഇനങ്ങൾക്ക് ആവശ്യമായ സൗകര്യങ്ങൾ മർകസ് ഇംഗ്ലീഷ് മീഡിയം സ്കൂൾ ക്യാമ്പസിൽ നിർമിച്ചിട്ടുള്ളത്. ഉന്നത നിലവാരമുള്ള അത്ലറ്റിക് ട്രാക്ക്, ഫുട്ബോൾ ടർഫ് കോർട്ട്, ഹർഡ്ല്സ്, റിലേ, സ്പ്രിന്റ് മത്സരങ്ങക്കുള്ള റണ്ണിംഗ് ട്രാക്ക്, വിവിധ ജമ്പിങ് ഇനങ്ങൾക്കുള്ള പിറ്റ്, ഷോട്ട് പുട്ട് സർക്കിൾ, വോളിബോൾ, ബാഡ്മിന്റൺ, ബാസ്കറ്റ്ബോൾ, അനുബന്ധ ഗെയിം കോർട്ടുകൾ തുടങ്ങിയവ സ്റ്റേഡിയത്തിന്റെ ഭാഗമാണ്.
അക്കാദമിക മേഖലയിൽ ബ്രിട്ടീഷ് കൗൺസിൽ, യുനെസ്കോ തുടങ്ങിയ അന്താരാഷ്ട്ര ഏജൻസികളുമായി അസോസിയേറ്റ് ചെയ്ത് പ്രവർത്തിക്കുന്ന സ്കൂളിന്റെ കായിക രംഗത്തെ കുതിപ്പിന് സ്റ്റേഡിയം വലിയ മുതൽക്കൂട്ടാകുമെന്നാണ് പ്രത്യാശിക്കുന്നത്.
രാവിലെ 9:30 ന് കാരന്തൂർ മെംസ് ക്യാമ്പസിൽ നടക്കുന്ന ഉദ്ഘാടന ചടങ്ങിൽ മർകസ് ഡയറക്ടർ ജനറൽ സി മുഹമ്മദ് ഫൈസി അധ്യക്ഷത വഹിക്കും. എംഎ റസാഖ് മാസ്റ്റർ എംഎൽഎ മുഖ്യാതിഥിയാകും.
കുന്ദമംഗലം പഞ്ചായത്ത് പ്രസിഡൻറ് സിവി ഷംജിത്ത്, മർകസ് ഡയറക്ടർ സിപി ഉബൈദുല്ല സഖാഫി, മർകസ് ഗ്രൂപ്പ് ഓഫ് സ്കൂൾസ് സി എ ഒ റഷീദ് സഖാഫി വിഎം, പഞ്ചായത്ത് സ്റ്റാൻഡിങ് കമ്മിറ്റി ചെയർമാൻ ബാബുമോൻ, പഞ്ചായത്ത് മെമ്പർമാരായ വി. അനിൽകുമാർ, ബിജു പൂതക്കണ്ടി, പിടിഎ പ്രസിഡൻറ് ഡോ. ഉമ്മർ മാസ്റ്റർ, എംജിഎസ് അക്കാദമിക് ഡയറക്ടർ മുഹമ്മദ് ഷാഫി, മുഹമ്മദ് ദിൽഷാദ്, ഹനീഫ് അസ്ഹരി തുടങ്ങിയവർ പങ്കെടുക്കും.
ഫോട്ടോ: ഇന്ന്(തിങ്കൾ) സംസ്ഥാന കായിക വകുപ്പ് മന്ത്രി ഒ ജെ ജനീഷ് ഉദ്ഘാടനം ചെയ്യുന്ന മെംസ് അത്ലറ്റിക് സ്റ്റേഡിയം.
About the Author
