കുന്ദമംഗലം: നാടിന്റെ ഐക്യത്തിന്റെയും സമത്വത്തിന്റെയും സ്നേഹത്തിന്റെയും സന്ദേശം വിളിച്ചോതുന്ന ഓണാഘോഷ ദിനത്തിൽ മുൻ എംഎൽഎയും മുസ്ലിം ലീഗ് സംസ്ഥാന സിക്രട്ടറി യുമായ യു.സി. രാമന്റെ വസതിയിലെത്തി കുന്ദമംഗലം എംഎൽഎ എം.എ. റസാഖ് മാസ്റ്റർ ഓണാശംസകൾ നേർന്നു. വർഷങ്ങളായി ഓണനാളിൽ രാഷ്ട്രീയ-സാമൂഹിക രംഗത്തെ മുതിർന്ന നേതാക്കളെയും പ്രവർത്തകരെയും നേരിൽ സന്ദർശിച്ച് ആശംസകൾ കൈമാറുന്ന യു.സിയുടെ വീട്ടിൽ റസാഖ് മാസ്റ്റർ MLA എത്തിയത് നവ്യാനുഭവമായി
മാവേലിയുടെ സുവർണകാലത്തെ ഓർമ്മിപ്പിക്കുന്ന ഓണം മതത്തിന്റെയും രാഷ്ട്രീയത്തിന്റെയും അതിർവരമ്പുകൾക്കപ്പുറം മനുഷ്യരെ ഒന്നിപ്പിക്കുന്ന ഉത്സവമാണെന്നും പരസ്പര സ്നേഹവും സൗഹൃദവും പങ്കുവെക്കാനുള്ള അവസരമാണെന്നും എം.എ. റസാഖ് മാസ്റ്റർ പറഞ്ഞു. സമൂഹത്തിൽ ഐക്യവും സഹോദര്യവും കൂടുതൽ ശക്തിപ്പെടാൻ ഓണത്തിന്റെ സന്ദേശം എല്ലാവരിലേക്കും എത്തണമെന്നും അദ്ദേഹം ആശംസിച്ചു.പന്തീർപാടത്തെ ” പടനിലം ” വീട്ടിൽ എത്തിയ റസാഖ് മാസ്റ്ററെ
യു.സി. രാമനും ഭാര്യയും മകനും ചേർന്ന് എം.എ. റസാഖ് മാസ്റ്ററെ ഹൃദയപൂർവം സ്വീകരിച്ചു. തുടർന്ന് ഓണപ്പായസം നൽകി അദ്ദേഹത്തെ സൽക്കരിക്കുകയും പരസ്പരം ഓണാശംസകൾ കൈമാറുകയും ചെയ്തു. ഏറെ നേരം സൗഹൃദ സംഭാഷണത്തിലും ഓണവിശേഷങ്ങൾ പങ്കുവെക്കുന്നതിലും ഇരുവരും സമയം ചെലവഴിച്ചു.
മുസ്ലിം ലീഗ് നേതാക്കളായ ഖാലിദ് കിളിമുണ്ട, ഹബീബ് കാരന്തൂർ, എം. ബാബുമോൻ എന്നിവരും എംഎൽഎയ്ക്കൊപ്പമുണ്ടായിരുന്നു.
ഓണം മലയാളികളുടെ കാർഷിക സംസ്കാരത്തിന്റെയും കൂട്ടായ്മയുടെയും ആഘോഷമാണ്. മഹാബലിയുടെ സ്മരണ പുതുക്കുന്ന ഈ ഉത്സവം ജാതി-മത-രാഷ്ട്രീയ ഭേദമില്ലാതെ എല്ലാവരെയും ഒരുമിപ്പിക്കുന്നതിന്റെ മനോഹരമായ ഉദാഹരണമായി ഈ സന്ദർശനവും മാറി.
About the Author
