കുന്ദമംഗലം: കഴിഞ്ഞ ദിവസം പുറത്തുവന്ന പ്ലസ്‌വൺ പരീക്ഷാഫലത്തിൽ മുഴുവൻ മാർക്കും നേടി മർകസ് ഗേൾസ് ഹയർസെക്കണ്ടറി സ്കൂൾ വിദ്യാർത്ഥിനി പവന സി. സയൻസ് വിഷയങ്ങളിലാണ് കുന്ദമംഗലം സ്വദേശി ചളുക്കിൽ ശബരീഷ് കുമാർ, സ്വപ്ന ദമ്പതികളുടെ മകളായ പവന മുഴുവൻ മാർക്കും നേടിയത്. ‘സ്കൂളിലെ അച്ചടക്കവും മാസാന്ത പരീക്ഷകളും പഠന പരിശീലനങ്ങളും മുഴുവൻ മാർക്ക് നേടാൻ സഹായിച്ചു. പ്ലസ് ടു പരീക്ഷയിലും മുഴുവൻ മാർക്ക് നേടണമെന്നതും നീറ്റ് പരീക്ഷയെഴുതി ആരോഗ്യരംഗത്ത് ഭാവി തിരഞ്ഞെടുക്കണമെന്നതുമാണ് ആഗ്രഹമെന്നും’ പവന പറഞ്ഞു. പവനയെ കൂടാതെ 12 പേർ മുഴുവൻ വിഷയങ്ങളിലും എ പ്ലസ് നേടി. കുറഞ്ഞ വ്യത്യാസത്തിലാണ് ഇവർക്ക് മുഴുവൻ മാർക്ക് നഷ്ടമായത്. പവനയെയും വിജയികളെയും ഈ നേട്ടത്തിന്റെ കൂടെ നിന്ന അധ്യാപകരെയും രക്ഷിതാക്കളെയും മർകസ് മാനേജ്‌മെൻറും പി.ടി. എയും അഭിനന്ദിച്ചു.
